Satellite Magzine

بعد إيقاف التصوير.. مها نصار تدافع عن “الملك”


April 6, 2021

علقت الفنانة مها نصار إحدى بطلات مسلسل “الملك أحمس” على قرار وقف تصوير المسلسل وتشكل لجنة لمراجعة السيناريو واتخاذ القرار المناسب تجاه العمل، وعبرت عن استيائها من قرار الإيقاف وعدم خوضه سباق رمضان المقبل بعد تعرضه لهجوم شديد مؤخراً.

وقالت مها: “كلام الناس فوق راسي من فوق سواء بالسلب أو بالإيجاب حقك تقول اللي أنت عايزه”.

وأضافت: “بس علشان أحترم كلامك لازم تكون بتتكلم صح، وعن وعي ودا ما بيتحققش غير بعد المشاهدة الجيدة للعمل.. أنا حابة أوضح حاجة صغيرة إحنا بنعمل عمل درامي مستوحى من التاريخ وليس فيلم وثائقي عن الملك أحمس، وإلا كنا هنعمل اللي في التاريخ بالضبط أن الملك أحمس اتجوز أخته؛ لأن في العصر ده كان جواز الأخوات عادي”.

وتابعت: “لكن إحنا بنعمل رواية اسمها كفاح طيبة للأديب العالمي نجيب محفوظ اللي قرأ الرواية هيفهم كلامي كويس.. الأديب كان ليه رؤية مختلفة من خياله ودكتور زاهي حواس في كلام سابق لما قرأ الرواية قال إنها مستوحاة من التاريخ وليست التاريخ.. فأنا مستغربة جدا لكلام دكتور زاهي حواس دلوقتي”.

وأردفت: “مدام المخرج بيعمل رواية من خيال الكاتب ومستوحاة من التاريخ ودا طبعا مكتوب على المسلسل، فمن حقه يبدع، ليه نحصر الفن في دايرة ضيقة، ونلف فيها، كلنا التزمنا بالرواية ودا بيحصل في العالم كله، ومش جديد أنه يضيف شخصية جديدة يغير شكل الممثلين يموت شخصية يطلعنا بنطير هو حر.. ولو كنا صبرنا كنا هنلاقي الكلام دا على التتر… الفن للمتعة والحكم دايما بيبقى فيه للجمهور اللي إحنا بنشتغل علشانه.

واختتمت كلامها: “وإحنا جمهورنا واعي، كفاية إنه يغير القناة لو حاجة معجبتهوش. وأنا بتحدي أي حد أنه بعد عرض الحلقة الأولى بس.. هيحصله انبهار وتشوق ومتعة وهيكمل المسلسل للآخر وهيحترم المجهود الضخم الواضح من كل صناع العمل.. علشان تبقي ناقد وأحترم كلامك وأفهمه لازم تكون بتكتب كلام محترم وهادف أفهم منه فين أخطائي وأصلحها وتضيف لي شيء جديد، ودا مبيحصلش غير بعد مشاهدة العمل، وفي الحالة دي بس لازم أسمعلك لأنك هتضيف لي شيء.. أنا فخورة جدا أني اشتغلت في مسلسل الملك”.

مواضيع مشابهة